Selaouit Radio Kerne war Internet, klikit amañ! [lennerioù all]

ER STALIOÙ (DIELLOÙ)

Miz Mae 2010

Oktopus Kafé Ar Vro Didu

Ar miz-mañ e kinnigomp deoc’h dizoleiñ ur bladenn nevez savet gant ar strollad Oktopus Kafe: Ar Vro Didu. Jean Floch (boest an diaoul), Pierrick Tardivel (gitar boud), Alain Léon(gitar), Ifig Flatrès (kan) a zo muzisianed ampart hag anavezet mat ba bed sonerezh Vreizh. Al lod vrasañ eus ar pozioù zo bet skrivet gant Per-Jakez Heliaz. Barzhonegoù divyezek, kanaouennoù "réalistes" gavoc'h war bladenn an Oktopus divoutin-se.

Miz Ebrel 2010

Darhaou
An Deirvet

Setu digouezhet an deirvet pladenn savet gant Darhaou. Tout an dud a oar bremañ piv eo ar strollad. Memestra ez eus traoù nevez da ziskouez er bladenn ziwezhañ: Mouezhioù zo, da gentañ  gant Christophe Le Menn evit al lodenn vrasañ deus an tonioù  ha pedet eo bet ivez Jean-Pierre Quéré. Dek ton a blijo sur a-walc’h da zivskouarn an dud,  swing zo atav  gant ar plinn, ar gavotenn ,ar rondou. Da selaou ivez: ur vals vrav « Alixir ». Kerzhit buan da selaou "An Deirvet" , ur bladenn a zo dija ur bladenn a- bouez.

Miz C'hwevrer 2010

Izhpenn 12
Kreizh Breizh Akademi

Goude "Norkst",  e teu pladenn  eil strollad ar C'hreiz Breizh Akademi "Izhpenn 12". 12 soner etre 20 ha 30 vloaz o doa labouret diwar-benn sonerezh Breizh Izel diouzh ar reolenn sonerezh mozhel (modale) ha ganti digoret o awen war sonerezh diaz ar C'hreizhdouar hag ar Reter-kreiz; Binvioù "kizidik"a ya da genaozañ al laz-seniñ-se, kerdin piñset, kerdin frotet, fleütoù,binvioù sko, ... 9 zon a laka ac'hanomp da veajiñ, tonioù a-boz ha tonioù da-zansal hengounel kenpennet a-nevez.

Miz Kerzu 2009

Erwan Hamon  Janick Martin
Sous Le Tilleul

Unnek vloaz  goude « la Viollette » sed aze ar bladenn nevez savet gant Erwan Hamon(Bombard,Fleüt) ha Janick Martin(Akordeoñs Daoudonek). Trizek  ton nevez  zo bet savet ganto evit plijadur hon divskouarn. Selaouomp  Ricardo Tesi (Paotr an akordeoñs  brudet  tre) diwar- benn  ar bladenn  « Sous le tilleul » : « …an daou-se o deus desket ha komprenet mat tre petra e oa spered ar sonerezh hengounel , abalamour d’an dra se o deus gellet krouiñ ur sonerezh  a-vremañ  nevez , gant startijenn .Ur bladenn leun ha tonioù divoutin savet  ha c’hoariet  brav »

Miz Du 2009

Louis-Jacques Suignard& Yann Guirrec Le barz Tcha Tcha Douarnenez

13 kanaouenn nevez savet en ur yezh a-vremañ, flour ha skañv, barrek da gas ac'hanoc'h da zañsal, kanañ ha nijal war douaroù divent ar fent hag ar from, ar c'halon hag ar reson.
Tcha-tcha-tcha !

Miz Here 2009

Alan Stivell Emerald

Sed aze ar bladenn nevez savet gant Alan Stivell: Emerald. Abalamour eo deiz-ha-bloaz e bladenn gentañ : "Reflets". Marteze ho peus bet tro da selaou war gwagennoù Radio Kerne un ton tennet eusouti: "Brittany's - Ar Bleizi Mor" kanet asambles gant Dom Duff : un ton lusket a raio berz emichañs. Daouzek ton all gant livioù disheñvel tre zo da zizoleiñ evit ho plijadur.

Miz Gwengolo 2009

Julien Vrigneau Carnet de Croquis

Ar miz-mañ e kinnigan deoc'h da zijoloiñ un arzour (Bombard, Whistles, Saxos, Treujenn-gaol, Gitar bout, Gitar, Samploù) a zo deuet a benn da veskañ brav sonerezh hengounel Breizh ha jazz (ne dalv ket swing). 62 vunuten a sonerezh elektro-akoustek, tekno, onerek. M 'o peus c'hoant da c'houzout muioc'h:

http://www.myspace.com/julienvrigneau

Miz Eost 2009

Bagad Cap Caval Ololé
War-lec'h ur bloavezh dispar e kas da benn Bagad Cap Caval ar pladennoù-mañ. Kampion Breizh ar bagadoù, kampion ar bed ar Pipe Bands e grade 2...
Kavet 'vo ganeoc'h er voest-mañ mareoù gwellañ ar strollad hag an heuliadoù o deus kaset ar bagad ken uhel-se !
Nerzh ar Vigouterien a bed ac'hanoc'h da veajiñ etre Breizh ha Bro Skos.

Miz Gouere 2009

Myrdhin
D'île en île. Setu  an  album nevez savet gant Myrdhin , telennour  ampart kenañ. Ur sonerezh   a gaso deoc’h  sonjoù plijus ha sioul evel un huñvre. Savet en deus tonioù disheñvel  gant e delenn  evit pep enezen  a blij dezhañ. Ur bladenn evit beajiñ  etre  enezen Skye pe Kern Arzur hag ivez e bro Japan war enezen Tsushima

Miz Even 2009

Tiùin
Ar miz-mañ e kinnigomp deoc’h dizoleiñ ur bladenn nevez savet gant ar strollad Tiùin (Ti-Ou-Ine evit distagañ mat). Ur sonerezh dispar evit ho tivskouarn ,  ya met peseurt meskaj eo ? Ma lavaran deoc’h eo  Shane Lestideau (Australia) a gan hag a son violoñs, Jerome Vacquet (Breizh) a son Bodhran hag Philippe Lamezec  a son gitar ha fleüt, e sonjoc’h  eo sur a-walc’h a liv geltiek . Respont a rin  deoc’h gwir eo , met moarvat e vo tu deoc’h  kaout liviou disheñvel mik ganto : Klezmer, broiou ar reter hag un nebeut jazz pe sonerezh savet war ar prim hep disoñjal ar swing….

Miz Mae 2009

Pascal Lamour-Avais-je rêvé ?
Tregont vloaz goude ma oa aet ar maout gantañ evit  « kan ar Bobl »,  sed aze navvet pladenn savet gant Pascal Lamour « Avais-je Rêvé ? “.  Ur meskaj dibar etre sonerezh elektro, tonioù hengounel kozh a lak ac’hanomp da hunvreal  gant ur sonerezh a –vremañ. Kanerien ha sonerien eus Breizh zo bet pedet :  Nolwen Korbell,  Louise Ebrel,  André le Meut, Bagad Locoal Mendon.  Evit achuiñ selaouomp ar pezh a soñj Paskal Lamour diwar-benn an hengoun :
« An hengoun n’ eo ket stanket e hent gantañ.Ur mont-ha-dont didermen etre dec’h ha hiziv »

Miz Ebrel 2009

Bernez Tangi-Lapous An Tan
Sed aze ar bladenn nevez embannet gant Bernez Tangi « Labous an tan »
Tonioù  kozh adsavet a vo kavet ennañ evel «  Gwerz Marv Jorj  Jackson »  
a zo aet da vezañ ur wir werzh « Plac’h  Landelo » zo bet gwisket gant ur dilhad nevez: ar gitar ‘neus kemeret plas ar biniou. Lakaet eo bet ivez war ar bladenn-mañ stumm orin « Plac’h ar gwele-kloz »(kanet gant Nolwenn Korbell war he fladenn ziwezhañ ).
Evit an tonioù nevez ez eus kalz  livioù disheñvel: “Soubenn ar brulu” un huñvre pe ur gwalhuñvre ,  “Lapous an tan “" an den hag a red”  a zo kentoc’h  tonioù rock gant startijenn.
Bremañ deoc’h c’hwi da zizoloeiñ anezhañ evit ho plijadur emichañs

Miz Meurzh 2009

:Wipidoup-L'opium Du Danseur
Kinniget e vo deoc’h ar miz-mañ dizoleiñ ur bladenn gentañ. Emaoc’h o sonjal marteze eo ur bladenn nevez savet gant deraouidi… Pa lavarin deoc’h piv eo Wipidoup, c’hwi a cheñcho ho soñj: o kanañ Gildas le Buhé,evit boest an diaol Régis Huiban ha gant ar vamm-gozh(gourebet) Pierrig Tardivel. Sed aze petra eo  gwir opium an dañserien.

Miz C'hwevrer 2009

Pennoù Skoulm-Trinkañ
Pemzek bloavezh goude, sed aze ar bladenn nevez savet gant ar Pennoù Skoulm. Ar strollad-mañ a zo anvet mat evit bezañ bet ur c'hroazhent etre strolladoù brudet all (Kornog,Gwerz), a glaske sevel ur sonerezh disheñvel da zañsal ha da selaou ivez. Ar sonerien-se zo brudet mat, anvet mat evit o barregezh (Jacky Molard, Jean-Michel Veillon, Christian Lemaitre, Roland le Bars ha Nicolas Quemener). Er Bladenn-mañ vo kavet startijenn evit an toniou da zañsal, melkoni evit ar re all... ur sapre meskaj evit hon divskouarn!

Miz Genver 2009
Squisse
Ar miz-mañ, e kinnigomp deoc’h pladenn nevez ar stollad «Esquisse»: Les trois rives. Eus Naoned int, hag abaoe 1999 int brudet e-giz sonerien festoù-noz (T. Badeau, G. Hervé, F. Badeau ha P. Le Normand), hag evit o c’honsertoù ivez. Daou liv zo war o zonioù, hini Breizh, hag hini Kuba gant Olivier Congar, un den dispar war ar binviji sko eus Afrika ha Kuba. Deuet int a-benn da grouiñ un aergelc’h a sonerezh plijus

Miz Kerzu 2008
Les Nouvelles Vagues Celtiques
19 arzour zo bet pedet evit sevel ar bladenn-mañ. Un nebeut anezho a grog da vezañ anavezet mat: Plantec, les Ramoneurs de Menhirs, Karma. Evit ar re all, liviou kalz disheñvel a zo: Rock prog gant Tornaod (ha memes un tamm metal), sonerezh hengounel da zañsal (Startijenn), hag hip hop (Iwan B), Jazz a-vremañ (Jerry Cornic). Sed aze ar pezh vo kinniget deoc’h dizoleiñ. Marteze ur mennoz mat evit ur prof Nedeleg.

Miz Du 2008
Koñsert 2
"Koñsert 2" a zo bet enrollet war al leurenn e-giz ar bladenn gentañ. Mard oc'h bet plijet gantañ e voc'h plijet c'hoazh ha marteze muioc'h . E-barzh ar bladenn-mañ po tro da zijoleiñ 13 ton, 8 anezho zo bet savet gant Armel An Hejer. Livioù a bep seurt vo tu da glevet: Ur vals "musette" krouet gant paotr bouest an diaoul, Joseph Colombo (cœur vagabond). 3 c'hanaouenn e galleg: le soleil de ma vie, les voyageurs, hag an ton brudet mat savet diwar ar standard jazz whispering "ah ! si j' avais un franc cinquante". Kanaouennoù hengounel e brezhoneg gant ur blaz nevez. Ar gitarour Bernard Bizien n'eo ket kollet e swing gantañ, ar soner fleut Malo Carvou a gas ac'hanomp da nijal, hag ar c'haner Armel An Hejer a ginnig deomp un doare all da ganañ e brezhoneg. Mersi bras dezho !

Miz Here 2008
Logodennig
N'eo ket ur bladenn a vo kinniget deoc'h ar miz-mañ; div a zo er c'houfrig cd ha marteze n'eo ket trawalc'h evit diskouez al labour vras zo bet graet gant Kristen Nogues (Telennourez, sonaozourez aet d'an anaon er bloavezh 2007). Tonioù anavezet ha tonioù n'int ket bet enrollet a-raok a zo prest da lakaat ho spered da hunvreal. Ur bladenn gaer evit enoriñ "al logodennig".

Miz Gwengolo 2008
Piano Ha Bombard
Ar miz man e kinnigomp deoc'h sonerezh a vesk binviji sonerezh na vezont ket klevet asambles alies: piano ha bombard. Krouet ha skrivet eo bet an tonioù gant Germain Desbonnet, ur mailh war an ograoù ha war ar piano, aet da anaon re yaouank e 2005, ha gant Gregory Al Lan talabarder dibar anezhan. Ur souezh eo penaos eo bet ijinet ganto ur mod nevez da c'hoari asambles. Da c'hortoz arzourien all o vont d'o heul.

Miz Eost 2008
Bothua-Guingot-Plijadur
Jorj Bothua (bombard), Pascal Guingot (binioù bras), Philippe Quillay (binioù kozh) ha Pascal Marsault (ograoù) a ginnig deomp ur bladenn e-lec'h m'emañ an hengoun kemesket gant kened en un henson dibar... Anat eo e teu an ijin eus "Bro Gwened" gant un dastumad tonioù bale, endro, laride... eus ar c'hentañ tout. "Plijadur", ur bladenn evit ar re a oar petra eo ar sonerezh hengounel.

Miz Even 2008
Red Cardell-Banquet de cristal
Ar boaz eo kinnig ur prof d'an hini a lid e zeiz-ha-bloaz. Ar c'hontrol eo amañ: evit e bemzekvet deiz-ha-bloaz e prof deomp Red Cardell (Jean-Pierre Riou, Jean-Michel Moal ha Manu Mesko) pemzek kanaouenn. Goulennet o deus gant mignoned dezhe, Gérard Blanchard, Thomas Fersen, Miossec, Dan ar Braz, Louise Ebrel , Farid Aït Siameur, Bagad Kerne, ar vreudeur Guichen, Ronan le Bars... dibab pep a ganaouenn en o repertoar evit kempenn anezhe e-giz e faote dezhe. Kaer ha liesseurt eo an disoc'h...

Miz Mae 2008
Annie Ebrel-Roudennoù
War he fladenn nevez emañ Annie Ebrel asambles gant ur strollad dic'hortoz a sonerien vrudet ha barrek kenañ: Pierrick Hardy (gitar), Olivier Ker Ourio (armonika) ha Bijan Chemirani ( binviou stekiñ). Kinnig a reont deomp kanaouennoù hengounel dibabet kaer ha mesket gant jazz: setu un dastumad heson a ra deomp hunvreal.

Miz Ebrel 2008
Roland Becker-Kanoù en Noz
10vet maen-korn oberenn sonet Roland Becker "Kanoù en noz", "Chants dans la nuit" zo ur meskaj a-feson etre sonerezhioù hengounel Breizh, ar jazz hag an tonioù elektronek. War ar roll: luskoù saouzanus, nijadennoù ul laz-seniñ, samploù kanerezed deus ar vro bet enrollet bloavezhioù zo (ar c'hoarezed Goadec e Kan Deu), hep disoñjal ar bombardoù, ar violoñs, an delenn, an ograoù Hammond... Da zizoloiñ buan !

Miz Meurzh 2008
Filifala-Vorona
Ar miz-mañ e kinnigomp deoc'h selaou ur bladenn nevez savet gant ar strollad Filifala: Vorona. Gwriziennoù ar strollad-se a zo er Su hag ivez tost ouzh harzhoù Breizh e Redon, Angers , Naoned... gant un droiad betek Enez ar Reunion evit brasañ plijadur ar sonerezh. Mennegomp izili ar strollad: Roland Brou (kaner), Dina Rokotomanga (gitar-bout, kaner), Yannig Noguet (akordeo–s), Roland Conq (gitar), Jean-Pierre Andrieux (violoñs). Dañsoù a-bep seurt 'vo kinniget gante... Plijadur deoc'h forzh pegement!

Miz Genver-C'hwevrer 2008
Ozan Trio-Koñsert
C'hoant da gregiñ e-barzh 2008 gant ur bladenn sebezus ha brav war an dro ? Selaouit ouzh ar bladenn Koñsert gant ar strollad Ozan Trio : ur c'haner, Armel an Hejer, ha daou soner a-feson : Malo Carvou (flut a-dreuz) ha Bernez Bizien (gitar). Ar c'hanaouennoù a deu eus hengoun don Kreiz-Breizh. Kanet eo gant kalz trivliadoù, gant emprestoù soutil a-wechoù da sonerezh Kreiz-Europa. Dibarelezh ar sonerezh hag ar c'hanaouennoù mesket ganti a ginnig ur bladenn blijus-tre da selaou. Un eil bladenn a deuio er maez diwezhatoc'h e-kerz ar bloaz.

Miz Kerzu 2007
L'écornifleur - François Pernel
Evit mont war hor pouezig betek fin ar bloaz e aliomp deoc'h selaou François Pernel hag e delennoù. Gouestlet en deus François Pernel e vuhez d'ar sonerezh ha d'an delenn. Moaien 'zo da selaou anezhañ war pladennoù ar strollad Seven Reizh, tomm ouzh kalon ar Gemperiz. Ouzhpenn seniñ en un doare plijus -a wechoù e-unan, a wechoù gant sonerien all- en deus François Pernel ijinet un delenn geltiek gant ur skeul-gan glok, ar pezh a zo aesoc'h evit seniñ muzik gant skeulioù liesseurt.War ar bladenn-mañ , "l'écornifleur" , eo aet François da dapout (ar pezh a ra un "écornifleur" ) ul lodenn eus e awen e meur a vro geltiek hag ul lodenn all en e faltazi.

Miz du 2007
Sans Sommeil
Sans sommeil (Coop Breizh) zo ur bladenn savet gant "Régis Huiban quartet". Gant ar strollad Kof a kof eo bet brudet Régis Huiban hag e "vouest an diaoul". Pell war-zu gwriziennoù o yaouankiz eo bet ar wech-mañ asambles gant Philippe Gloaguen (gitar), Julien le Mentec (gourrebed), Loic Larnicol (tamboulinoù).Pedet eo bet ar vuzisianed evit ar bladenn-mañ. Kregiñ a ra ul lodenn vat eus an tonioù gant ur pennad enrollet e-touesk tud eus ar vro hag e talc'h da vont gant ar pezh o deus ijinet. Ur album kaer ha plijus da selaou evit ar re a a soñj dezho bezañ modern na dalvez ket disonjal an amzer tremenet.

Miz gwengolo 2007
Toud' sames - An den dilabour
An den dilabour eo pladenn ziwezhañ bet savet gant ar strollad "toud' sames". Brudet-tre eo an holl vuzisianed hag ar c'haner Lors Jouin. Ur souezh eo pegen dous eo ar meskaj binviji hag int c'hoariet en un doare soutil-tre : guitar boud, binvioù taos, fleüt. An testennoù diwar-benn darvoudoù ar vuhez a zo don, kaer, leun a furnez hag a breder.

Miz gouere 2007
Plantec - A-raok
War ar bajenn internet da ginnig da strollad Plantec (gant My Space) e vez diskrivet e-giz-se ar strollad : Rock keltiek elektro breizhek. Gwir eo, eo bet pinvidikaet sonerezh Plantec gant samploù (M-Kanik) ha gant kan dreist holl (Mael Lhopiteau). Gwelet vez mat ur strollad o vont war-raok, dre hentoù arzel nevez : Gant ma pado!

Miz genver 2007
Yann-Fañch Kemener - Dialogues
Tri fal, tri c'hoant a oa ganet e penn Yann-Fañch Kemener evit sevel e bladenn ziwezhañ "Dialogues". Peogwir e oa o krouiñ gant ar gourrebedour Aldo Ripoche hag ar sonerez piano Florence Pavie en doa c'hoant da gemmeskañ o zeir gwirionez , o zri benveg, o zeir amzer. C'hoant en doa da lakaat asambles ar skridoù hag ar c'homzoù, resister ar sonaozadur, an adskrivañ ha gwevnder krouadennoù ar bobl . E-giz-se e soñje dezhañ gellet sevel un oberiadenn a-vremañ ha doujus ouzh an holl.

Miz gwengolo 2006
Lammat
Anavezet mat eo Soig Siberil, ur mailh war ar gitar. Gwelet vez war leurennoù ar vro abaoe un ugent vloaz bennak. Blaz e bladenn nevez "lammat" a zo ur meskaj etre sonerezh akoustek ha sonioù elektro a-drugarez da baotred strollad Abstrackt Keal Agram. Selaouit an Ton "Gollodi" ha ne veoc'h ket dipitet.

Miz even 2006
Alan Stivell
War c'horre ar bladenn gentañ warn-ugent kinniget deomp gant Alan Stivell bar-mare-mañ e c'heller kaout ur meskaj keltiek, elektro, ragga, hip hop, ha sonerezh Reter Europa. Gant samploù ha loopsoù an elektro diazez-se e talc'h Alan Stivell da sevel sonerezh, levezonet mat gant ar bed a-vremañ.

Miz c'hwevrer 2006
Paskal Lamour
Yer mat, pladenn ziwezhañ Paskal Lamour a raio deoc'h beajiñ e-barzh e ved pinvidik-mor, e formulennoù alchimier : emañ okupet bras o sevel e Oberenn wenn. Klavieroù, kan, programoù e urzhiataeroù, harmonika, gitar-klevet, binvioù a-bep-seurt mesklet brav gant un awen dic'hortoz: amañ emañ rekipe kuzh hor Shaman... Tud a zo dija a zo bet bamet ha labouret o deus asambles gant Paskal: Bagad Ro–sed Mor, Dom Duff, Ffran May hag Abdou Kamal.

Miz genver 2006
Awen Magic Land
Pa 'n eus en em gavet Maria Desbordes (ezel eus al laz-kana Penn-ar-Bed) ha Carlos Soto (krouer ar strollad Celtas Cortos) asambles o deus ganet ar grouadenn vuzik Awen Magic Land. Kempennet o deus sonerezh ar Broioù Keltiek, ijinet o deus arajamantoù nevez d'ober da Vreizh keja-ouzh Bro Spagn! Da zizoloiñ buan!